திரு. விஜயகாந்த் அவர்களுக்கு வணக்கம்.உங்கள் கட்சி தொண்டர்களும் ,உங்களின் ரசிகர்களும் உங்களை அழைப்பதைப்போல புரட்சி கலைஞர் என்றோ கேப்டன் என்றோ என்னால் உங்களை விளிக்க முடியாது. ஏனென்றால் எனக்கு புரட்சியை பற்றியும் , புரட்சியாளர்களை பற்றியும் நன்றாகவே தெரியும். ஆகையால் தங்களை விஜயகாந்த் என்றே அழைக்கிறேன்.
இந்தியா போன்ற ஜனநாயக நாட்டில் யார் வேண்டுமானாலும் தேர்தலில் போட்டியிடலாம்; வெற்றி பெற்று முதலமைச்சர் ஆகலாம்.கட்சி ஆரம்பிக்கலாம்.ஆகையால் நீங்கள் ஒரு நடிகர் என்ற காரணத்தினால் அரசியலுக்கு வரக்கூடாது என்றோ முதலமைச்சர் ஆகக்கூடாது என்றோ ராமதாஸ் போன்றவர்கள் கூறிவருவதைப்போல நான் கூற வரவில்லை.தேர்தலில் நில்லுங்கள் வெற்றி பெறுங்கள் ஆட்சியை பிடியுங்கள் அது உங்கள் உரிமை.
ஆனால் தமிழ் நாட்டில் மட்டும் நடிகர்கள் சினிமாவில் நடிப்பது கட்சி ஆரம்பித்து முதலமைச்சர் ஆகிவிட வேண்டும் என்ற காரணத்திற்க்காக மட்டுமே இதையே நான் எதிர்க்கிறேன். ஒரு சமையற்காரனோ, ஆலது நாவிதனோ தங்கள் தொழிலை எப்படி தங்கள் வருமானத்திற்கு மட்டுமே செய்கிறார்களோ அதைப்போல நடிப்பதை உங்கள் வருமானத்திற்கான தொழிலாக மட்டுமே பாருங்கள்.
அதை விடுத்து முதலமைச்சர் கனவை அல்லது குறிக்கோளை மட்டுமே அடிப்படையாக கொண்டு நடிக்காதீர்கள். இதை அனைத்து நடிகர்களுக்குமே சொல்கிறேன்.மிகவும் பின்தங்கிய பீகார் போன்ற மாநிலங்களில் கூட இதைப்போன்ற நிலைமை இல்லை.ஆனால் நீங்கள் அரசியலுக்கு வந்தது ஒரு விபத்தே. நீங்கள் திட்டம் போட்டெல்லாம் சினிமாவிற்கு வந்து அரசியலில் குதிக்கவில்லை என்பதை புரிந்துகொள்ள முடிகிறது.
யாருடனும் கூட்டணி கிடையாது மக்களுடனும் கடவுளுடனும் தான் கூட்டணி என்ற உங்கள் முழக்கமும் அதனை செயல் படுத்திக்கொண்டிருப்பதும் மிகவும் பாராட்டுக்குரியதே.நீங்கள் கருணாநிதியை கிழி கிழி என்று கிழிப்பதேல்லாம் நன்றாகவே உள்ளது. ஆனால் ஜெயலிதாவை மட்டும் சமீபகாலமாக விமர்சிப்பதில்லையே ஏன்?
கருணாநிதியை வீழ்த்த ஜெயலலிதாவுடன் கூட்டணி வைத்தால் தான் முடியும் என்ற விவேகமா?.
எனது நண்பர்கள் பலர் கடந்த சட்டமன்ற தேர்தலில் உங்களுக்குதான் வாக்களித்தார்கள்.கருணாநிதி ஜெயலலிதா போன்ற அராஜக ஊழல் வாதிகளுக்கு மாற்றாக உங்களை எண்ணியதே அதற்கான காரணம். உங்களின் மீதுள்ள நம்பிக்கையின் காரணமாக அல்ல. நீங்களும் ஒரு ஐந்து ஆண்டு அதிகாரத்தில் இருந்தால் என்ன செய்வீர்கள் என்பது உங்களை சுற்றியிருக்கும் கூட்டத்தை பார்த்தாலே புரிந்து விடும்.
ஒருவேளை நீங்கள் காந்தின் பேரனாக கூட இருக்கலாம்.ஆனால் உங்கள் கட்சியின் பொறுப்பில் இருக்கும் கட்சிகாரர்கள் அனைவரும் எதற்காக உங்களின் கட்சியில் இருக்கிறார்கள்?. நாட்டு மக்களுக்கு நன்மை செய்ய வேண்டும் என்ற ஒரே காரனத்திற்காகவா? சேலத்தில் நடந்த உங்களின் மாநாட்டிற்கு கூட்டம் கூட்ட செலவு செய்தார்களே அந்த செலவை எதற்காக செய்தார்கள்? இந்த நாட்டு மக்களுக்கு ஏதாவது நல்லது செய்ய வேண்டும் என்ற காரனத்திற்காகவா? யாருடனாவது உங்கள் கட்சி கூட்டணி சேர்ந்து ஆட்சி அதிகாரத்தை கைப்பற்றினால் அதில் சம்பாதித்துக்கொள்ளலாம் என்ற காரணத்தினால் தானே?.
நீங்கள் சேலம் மாநாட்டில் பேசிய பேச்சு நன்றாகவே இருந்தது.நீங்கள் கருணாநிதியை பார்த்து கேட்ட கேள்விகளும் அருமை.அப்படியே நீங்கள் உங்களுக்கு பின்னால் மேடையில் அமர்ந்திருந்த உங்கள் கட்சி நிர்வாகிகளை பார்த்து '' நான் முதலமைச்சர் ஆனால் நீங்கள் ஒருவரும் எம் எல் எ சம்பளத்தை தவிர வேறு எதையுமே சம்பாத்திக்க முடியாது என்றும் ஒரு ரூபாய் உழல் செய்தீர்கள் என்றால் கூட கடுமையான தண்டனை வழங்குவேன் பார்த்துக்கொள்ளுங்கள் இதற்க்கு சம்மதம் என்றால் எனது கட்சியில் இருங்கள் இல்லையென்றால் கட்சியை விட்டு வெளியேறி விடுங்கள் '' என்று கூற உங்களுக்கு தைரியம் இருக்கிறதா?
அப்படி நீங்கள் கூறினால் உங்கள் கட்சியில் பொறுப்பில் இருப்பவர்கள் தொடர்ந்து இருப்பார்களா? ஆகையால் நீங்கள் ஒரு வேளை ஆட்சியை பிடித்தாலோ அல்லது அதிகாரத்தை பகிர்ந்து கொண்டாலோ நீங்களும் மற்றுமொரு கருனாநிதியாகவோ அல்லது ஜெயலலிதாவாகவோ தான் மாறுவீர்கள் என்பது இப்பொழுதே தெளிவாக தெரிகிறது.
நீங்கள் ஜெயலலிதாவுடன் கூட்டணி சேர்ந்தால் நாங்கள் எதற்கு உங்களுக்கு ஒட்டு போட வேண்டும்?. நேரடியாக ஜெயலலிதாவிற்க்கே வாகளித்துவிடுவோமே!. இடையில் நீங்கள் எதற்கு?. ஒன்று சொல்கிறேன் தேர்தலில் வெற்றி பெற்றால் மட்டுமே வெற்றி பெற்றவர் என்று ஆகிவிடாது. தனது கொள்கைக்காக எந்த சமரசமும் செய்து கொள்ளாமல் அதனால் தனக்கு எந்த பாதிப்பு வந்தாலும் அதைதாங்கிகொண்டு அந்த கொள்கைக்காக போராடுவதே உண்மையான வெற்றியாகும் .
ஆகையால் நீங்கள் அதிகாரத்தை பிடிக்காவிட்டாலும் பரவாயில்லை. உங்கள் கொள்கையான மக்களுடனும் ஆண்டவனுடனும் மட்டுமே கூட்டணி வேறு யாருடனும் கூட்டணி கிடையாது என்ற கொள்கையுடனே இருங்கள்.சமரசமின்மையின் வெற்றியை ருசியுங்கள்.வரலாற்றில் உங்களுக்கு இடம் இருக்கும். அதை விடுத்து மற்றொரு ராமதாசாகவோ , வைக்கோவாகவோமாறிவிடாதீர்கள்.
ஆனால் இதற்கெல்லாம் உங்கள் கட்சியில் பொறுப்பில் இருப்பவர்கள் எப்படி உடன்படுவார்கள் என்றுதான் தெரியவில்லை. எத்தனை நாள்தான் செலவு செய்து கொண்டே இருப்பார்கள்? சம்பாதிக்க வழியில்லாமல்.......
